उच्चतर चेतना : प्रस्तावना

मनुष्य हा पृथ्वीतलावरचा अंतिम टप्पा आहे, अशी बहुधा सर्वांची समजूत असते. परंतु ‘मन हा या सृष्टीच्या निर्मितीमधील शेवटचा टप्पा नाही किंवा मानवी शक्यतेचा देखील तो शेवटचा टप्पा नाही. मानवी मन आज बौद्धिक, वैचारिक मनाच्या टप्प्यापर्यंत येऊन पोहोचले आहे. परंतु या मनाच्या पलीकडे जात मनुष्य हा, उच्च मन (Higher Mind), प्रकाशित मन (Illumined Mind), अंतःस्फूर्त मन (Intuitive Mind), अधिमानस (Overmind) येथपर्यंत जाऊन पोहोचू शकतो,’ असे श्रीअरविंद आणि श्रीमाताजी यांनी आपल्याला सांगितले आहे. या प्रत्येक स्तरावरील बारकावे त्यांनी उलगडून दाखविले आहेत.

श्रीअरविंद आणि श्रीमाताजी यांच्या भगीरथ प्रयत्नामुळे अतिमानस-चेतनेचे (Supremental Consciousness) आविष्करण घडून आले. पण व्यापक जनसमूहाला त्याचा लाभ व्हायचा असेल तर, व्यापक जनसमूहाने उच्चतर चेतनेच्या (Higher Consciousness) पातळ्यांवर चढून जाणे आवश्यक आहे.

उच्चतर चेतनेचे मानवी चेतनेवर जे कार्य चालते त्यातील काही पैलूंना आपण उद्यापासून सुरू होणाऱ्या ‘उच्चतर चेतना’ या मालिकेमध्ये स्पर्श करणार आहोत.

संपादक, ‘अभीप्सा’ मराठी मासिक