श्रीमाताजी आणि समीपता – ३६

‘अतिमानसिक साक्षात्कार’ (supramental realization) हे आपले उद्दिष्ट आहे आणि त्यासाठी जे करणे आवश्यक आहे ते आपण केले पाहिजे किंवा प्रत्येक टप्प्यावर प्रत्येक परिस्थितीत, त्या साक्षात्काराकडे घेऊन जाणारे जे काही आहे ते आपण केले पाहिजे. शारीरिक चेतनेची तयारी करणे ही सद्यकालीन आवश्यकता आहे; आणि त्यासाठी संपूर्ण समता व शांती आणि वैयक्तिक मागण्या किंवा इच्छा यांपासून मुक्त असणारे शारीरिक व कनिष्ठ प्राणिक भागांमधील संपूर्ण समर्पण या गोष्टी प्रस्थापित करण्याची आवश्यकता आहे. इतर सर्व गोष्टी त्यांच्या योग्य वेळी येऊ शकतील. शारीरिक समीपता ही त्या इतर गोष्टींपैकीच एक गोष्ट आहे, आत्ता त्याचा अट्टहास करण्याची खरंतर गरज नाही, मात्र शारीरिक चेतनेमध्ये आंतरात्मिक खुलेपण (psychic opening) आणि तेथे श्रीमाताजींची उपस्थिती व त्यांचे मार्गदर्शन यांची सध्या खरी आवश्यकता आहे.

– श्रीअरविंद (CWSA 32 : 491-492)